العراق الجريح

شهداء الوطن
---------
كل سنه بهذااليوم يمنه تسيرون.
بعده الوطن ماطاب خافن تنشدون .
صرتوا بدربنه أشموع بالظلمه تضوون .
وعلمتوا كلهه الناس طبع الوفه شلون .
..............


وصيه
-------
كلما تمر ذكراك أرجع البيتك .
الوطن لاتنسوه جانت وصيتك .
الوطن ماننساه ولاننسه أسمنه .
لابد يجينه يوم نحقق حلمنه .
الوطن لاتنسوه يلغبتوا عنه .
بعده حزنه امجيم بديار أهلنه .
..............
صمود


اصبر وشد الجروح وأنزف فلا اطيح .
حتى الوطن ليضيع وي عاصف الريح .
.............
تساؤل
------
أكعد يبعد الروح شوف أ شجرالي .
مدري ابجي علبغداد مدري أعله حالي .
........
حقد
يردونك الشمات غارك بالهموم .
صدكني مرعوبين من صحوة اليوم .
..............
لقاء مع أمي
---------
من أمي ما حسيت طعم الملاكه .
كالتلي الأمريكان صارولي ساده .
كلتلهه يمه أتهون مده أويولون .
كالتلي والعباس ماظنتي يمشون .
.............
خيبه


وي أهلي ما حسيت لهفه للعناك .
حلمي وحلمهم جان مو هذا العراك .
..................
شكوى


ألمن بعد أشكيه همي ومصابي .
وألي أشتكيله صار هو عذابي .
.............
حيره
ريبه وكثر وهواس والحيره زادت .
بين الكلت والكال وادمنه تاهت .
................
أستغاثه
_______
هذا العراق أيصيح وين النشامه .
ذلوني هاي أسنين كافي المهانه .
أنهنت ونذليت محد فزعلي .
تاليهه ناس أجناب هي الخذتني .
..............
امنيه
--------
يمته حزنه يزول وتزول الهموم .
ويمته كمرنه أيعود ونزفله النجوم

هذى منقوله لكن صدك يسلم كاتبها الله يعطيه الف عافية انى مو اعرفه شخصيا وانما عجبتنى هقصيده كلش قوية وجميلة هوووواية وجنت مدرى شسوى غير انقلهلكم اسف لانى احجى عراقى هسه لكن هذا علمود القصيده يارب تعجبكم